حوار صحفي

شكرا على الفكرة الرائعة

مشكور يا اسير الانتقام وبدنا اياك تشاركنا بدي احضرلك اسئلة خصوصي الك استنا علي بس

فكرة حلوة كتير والله يا عصفور النار وانا كمان حضرلي اسئلة ههههههههههههه بس احنا بنستنى رد لارا على الحوار الصحفي ومشكور جدااااااا يا عصفور النار على الفكرة الرائعة جداااااااا لنتعرف اكثر على بعضنا البعض ويسلمووووووو ايديك

مشكورة يا اميرة الاحزان على مرورم وعلى دعمك ولا يهمك بحضرلك اسئلة بس انتو كمان ساعدوني يعني انتو كمان اذا حبين تعملو لقاء صحفي مع احد الاعضاء بامكانك ذلك.

مشكور يا عصفور النار فكره حلوه وانا اليوم بقول للارا انه تجاوب

شكرا يا مينا

ولو يا عصفور مش محتاجه لشكر والله الفكره كتير اعجبتني

هي تالت واخر مره بكتب فيها الحوار
س1.. منذ متى وأنت احدى عضوات الشلة؟
من شهر تقريبا او اكتر
س2 .. كيف كانت بدايتك مع الشلة ومالطريقه التي تعرفتي بها الى منتدى الشلة؟
اول بدايتي تطاوشت انا وسليم وبعدين ما كنت اعرف اعمل شي بالمنتدى الا التعليق وشوي شوي صرت اعرف اكتب مواضيع طبعا اكترها كان منقول ولهلا منئول ليش الكزب بس كم من موضوع اللي مش منئولين وزي ما بتئول الاخت رنوش في كتير من مواضيعي معاده بس يللا بدكم تقرأو وانتو ساكتين لئدام شوي بتطور شوي شوي
س3 .. ماهي مؤهلاتك العلميه ؟
اول ثانوي وصلت للتوجيهي وما ئدمتو بسبب السفر من القدس لعمان وكل مره كانو يعيدوني الصف لاختلاف المناهج يعني ئدمتو مرتين والمره التالته ما ئبلت ائدمو ودرست بمعهد للتجميل صريحه زياده عن اللزوم صح
س4 .. مانوع القراءات التي تشد انتباهك ؟
الغريبه
س5..اي المنتديات تفضلينها ولماذا ؟
كلها حلوه اكتر شي الحوار الساخن والغرائب وطبعا الاحلام والابراج لاني مشرفه عليهم
س6 .. هل لك كتابات شعرية ؟
كان الي زمان بس هلا الوحي طار كنت اكتب شعر وقصص قصيره وهلا مو متزكره منها شي بس كنت اشارك بالمدرسه بمسابقات واكتر من مرة تكرمت في الاردن والقدس
س7 .. هناك اناس عندما تحاور اقلامهم تجد شي يلفت انتباهك لهم وترتاح في التعامل معهم
ماهو مقياس لارا في التعامل مع الناس ؟
ما في مقياس معين بحب اتعامل مع الكل عشان اعرف كيف الناس بتفكر واجمع قدر الامكان من الافكار واخد المنيح اللي فيها واللي مو منيح باخدو عبره اللي ما اغلط فيه وبرمي بس اذا كان الواحد متكبر الله والغني عنو لابدي اياه لا هو ولا افكارو
س8.. اختاري ثلاث اعضاء في المنتدى تميزوا وماهو سبب تميزهم في نظر لارا
عصفور النار لانو مواضيعو حلوه وسكر لانو مزيح ودمو خفيف ومينا لانها هبله وتعليقاتها بتضحك ورنوش موف نونا سايكوس دريمر
س9.. لو قلت للاراماهو اكثر شي ضايقك في منتدىالشلة وبصراحه ماهو ردها
هو شي وراح لما سليم غلط فيي بدون ما ائرب عليه ولا اجي نا حيتو وكنت ناويه اترك المنتدى عشانو ولانو سايكوس تارك المنتدى وما بفوت عليه
س10 .. ماهو رأيك في
1- العلاقات في النت سواء بين الجنسين او من نفس الجنس
لا طبعا ما بتعجبني ممكن انو زي علاقاتنا احنا بالمنتدى الشباب والبنات بس في منهم بفكرو النت عشان يحكو مع الشباب ويعملو علاقات خارجيه وما بياخدو الايجابيات من الحكي مع الشباب زي مثلا كيف بفكرو شو ارائهم اللي يستفيدو منو في المجتمع لئدام اللي بيتجوزو بيعرفو كيف بفكر الزلمه اما في بنات خلو النت بخوف
- كتابة البنت في المنتدى
ما فهمت شو الغلط اللي بالموضوع طالما انها بتفكر زيها زي الشب وما بتطلع عن حدود الادب وين المشكله كلنا هون منكتب ومنشارك ومنمزح وبحدود بالعكس انا كتير مبسوطه في تعاملنا مع بعض في الشله لانها بحدود الاحترام
س12 .. لكل منا تجارب في الحياهـ وكل تجربة نعيشها لابد ان نستخلص منها مجموعه من الدروس والعبر

لو بإختصار تسمح لنا لارا بمشاركتها خلاصة هذه التجربة وماالدرس الذي استخلصته منها ؟
يعني ممكن احكي ئصه صارت معي مع صديقه العمر كنت بعرفها من كان عمري 6 سنين لحديت هاي السنه طبعا ظروف الحياه خلتني اسكن بالعقبه وهي بعمان ئبل كم من شهر حكت معي وئالت بدها تيجي عندي ان انبسطت ئلتلها تعالي وئالت بدها تنام عندي كم من يوم بس بدها اياني احكي مع امها اطمنها عليها ئلتلها ماشي وحكيت مع امها واجت عندي وفاجأتني انها نزلت من سياره خاصه لما سالتها ئالت انها نازله مع جروب بنات وئريب صاحبتها وصلها لما نزلنا على البحر لئيت واحد اجى يسلم عليها وئعدتو معنا طبعا انا نهيت الئعده ولما سالتها ئالت انو الجروب بنات وشباب وما ئبلت تروح معي لانهم حاجزين شقق فندقيه ولما فتشت وراها ولاني بعرف العئبه عرفت انو شئه مفروشه واكتشفت انها والشي ئاعدين بالشئه مع بعض واللي صدمني اكتر انو اخلائها كتير عاليه كيف صار هيك وطبعا ما ئدرت احكم عليها او احكي لامها لاني خفت وصارت رايحه جاي على العئبه بدون ما اعرف وتحكي انها عندي بالصدفه اعرف فانا بنصح الكل انهم ما يأمنو كتير لصاحباتهم لانو الانسان بتغير ولما يشوفو شي يحكو وما يخافو متلي عشان ما يتورطو وبالذات انو خواتي صارو يلوموني ويحكو اني متواطئه معها بس شو بدي اعمل انا خفت من اهلها اذا ئلتلهم راح يتركوها ويتركوه ويدئو فيي انا بس المفروض اني حكيت من الاول وما سكتت

س11 .. كلمة تقوليها

1 – للإدارهـ
2- لمجلس الإداره والمراقبين
3- للمشرفين
4- للاعضاء
5- لعضو من اختيارك


الله يعطيكو العافيه والمنتدى كتير حلو وعمالو يتطور والمنتدى بيحلى بتعاونكم وحبكم لبعض وبئلك يا عصفور يسلمو عل الفقره الحلوه انت فعلا راح تئربنا من بعض اكتر وتخلينا نعرف بعض اكتر ويارب اكون جاوبت على اسالتك منيح ويسلمو جد انت مواضيعك بتجنن ويعطيك العافيه

يا لارا انا شفت حوارك قبل بس المشكله صار خلل بالمنتدى وبعض الردود والمساهمات انحذفت لحالها بس ان شاء الله ردك هالمرة ما يروح لانه اكيد تعبتي وانت تكتبيه بس بجد انت انسانة رائعة جدا والحلو فيك صراحتك وصدقك ودمك عسل والله وانا بصراحة بشكرك كتير على الصراحة اللي انت فيها وهاد شيء حلو فيك وبميزك كتير وشكراااااااااااا لك وشكرااااااااا لعصفور انه اتاح الفرصة انه نتعرف عليكي اكتر من خلال الاسئلة واحنا بانتظار الحوار الصحفي التاني يا اخ عصفورررررر وشكراااااااااا للجميع.

مشكورة يا لارا كتير على ردودك على الاسئلة .وعن جد استفدنا كتير منه وخاصة بالتجربة الي قولتيلنا عليها .واكيد انا برايي انه ما لازم البنت تنام برة بيتها مش لانه انا رجل شرقي لا بس الدنيا ما فيها امان .واد ما كان الواحد عند اخلاق الا انه الانسان بيغلط ومافش حد كامل بالدنيا.الكمال لله وحده.
وانا كتير متاسف انك عدتي الردود اكتر من مرة بس زي ما قالت اميرة انه كان في خلل بالمنتدى وانمسح ردك اكتر من مرة بس اكيد اني بتشكرك كتير يا لارا وبالفعل كنتي صريحة كتير .
واخيرا اتمنى لك يا لارا كل التوفيق والسعادة بحياتك

شكرا يا عصفور وانا انبسطت اني شاركت في الحوار ولا تتاسف انت هيك بتزعلني بس انا لاني بطيئه بالكتابه هاي كانت مشكلتي بس عادي خليتني اتدرب على الكتابه اكتر وهلا صرت اسرع بفضلك يعني انت فدتني وانت مش عارف ولاني ما كنت حابه تفكر انو التاخير مني وبالنسبه للغلط اللي غلطتو البنت كان كتير كبير يعني انا ما بسميها غلطه لانو الوحده فينا ما بتتحمل هيك غلطه هاي لازم تموت لانها ما بتستحق الحياه ولعلمك هلا اي حد بيجي عندي او حتى بس بعرف انو بالعقبه بفتح خط على كل عيلتو عشان اخبرهم واذا ما شفتهم بحكي لعيلتهم يعني يا زلمي عئدتني وبالنسبه لاميره يسلمو على الكلام الحلو اللي كتبتيلي اياه عنجد خجلتيني انا ئلت هلا بيحكو عني هبله وغبيه بس ما كانت فارئه معي كتير المهابيل عايشين اكتر هلايام ومرتاحين اكتر بعدين كبرتي راسي يسلمو كتير واكيد انتي انسانه اروع يسلمو كتير يا جماعه وسلام

شكرا يا لارا
وهلا صار الوقت لتاني حوار صحفي .وضيفتنا اليوم هي اميرة الاحزان.........
س1.منذ متى وانت عضوة في منتدى الشلة؟
س2.ماهو اكتر شيء تكرهيه في الناس.وما هو اكتر شيء بتكرهه الناس فيكي؟
س3.عمرك في احد الايام كرهتي الحياة وتمنيتي انه تكوني شخص اخر او في زمن اخر ؟متى ولماذا؟
س4اميرة عندما تحب كيف يكون الحب بنظرها؟
س5.اميرة لما بتكره كيف بيكون الكره بنظرها؟
س6ما هو رايك بالصداقة وهل هي موجودة حقا في زمننا؟
س7.من هم اقرب الاعضاء الى قلبك بمنتدى الشلة؟
س8.هناك اشخاص يجلسون على الانترنت لمجرد التسلية واشخاص يجلسون على النت للاستفادة اي الاشخاص انت ؟
س9.هل تشعرين بمسؤولية كبيرة نظرا لانك من ادارة المنتدى ؟
س10.ما هو اكتر شيء استفدتيه من منتدى الشلة؟
واخيرا كلمة اخيرة توجهيها الى اعضاء منتدى الشلة؟.

قبل كل شي بدي اشكر عصفور النار على هالحوار وبجد انه كتير حلو والاحلى انه بخلينا نتقرب من بعض ونعرف بعض اكتر واكتر ونعرف شو يلي بحبه اعضائنا ويلي بكرهوا

المهم راح نبلش هالحوار يلا

منذ متى وانت عضوة في منتدى الشلة وكيف اصبحتي عضوة في المنتدى؟

انا عضوه في المنتدى من 16-5-2008 وكيف صرت عضوه بهالمنتدى بالاول كنت ادخل زائه تحتى اشوف شو نوعيه المنتدى وانا اول مره بسجل بمنتدى وبشارك فيه وكانت الدعوة من طرف الاخ دريمر فقلت اجرب وبالعكس كتير كتير انبسطت بهالمنتدى وحتى لما انشغل شوي عنه بحس انه ناقصني شي صار كانه جزء من حياتي وفي كتير اعضاء بحبهم

س2. من هي مينا وما هو هدفها في الحياة؟

مينا بنت عاديه ما بقدر احكي عن حالي كتير لاني مش من النوع يلي بتفشخر او بحب يحكي عن حاله لهيك بدي اقول سلبياتي وايجابياتي
بحب اضحك وامزح صريحه كتير وما بعرف اجامل حد اجتماعيه يمكن باخد على الواحد ازا اعجبني طبعا بسرعه ولكن بحدود الادب ما بعرف اخبي شي ويلي ما بعجبني بقله بوجهه ويمكن اغلب مشاكلي من هالشي عصبيه ونفسي اتخلص من عصبيتي هاي يمكن شوي حساسه وبكفي لهون
هدفي بالحياه اني اخلص ماجستير على خير يعني هدفي الاول بالحياه هو التعليم اول شي وهدفي اني اشتغل بمجال بحبه ومجال تخصصي وكمان اني اوصل لدرجات اعلى واعلى ان شاء الله

س3. ما هي التجربة التي تتمني تكرارها؟
يعني ما في شي محدد ودايما اي تجارب بتكون لمره وحده بس يمكن في تجربه او مش تجربه هي كانت زي شي انا عملته وبهالشي دايقت شخص كتير عزيز علي فلو برجع الزمن ممكن اصحح الشي يلي عملته عشان ما ازعل حد مني وبنفس الوقت ما اجرح حد لاني ما بحب ازعل حد مني

س3. ما هو:1.أعظم شيء فقدته

اعظم شي فقدته هو الاب

2.وأعظم جرح دفنته

قبل شوي قلت اني جرحت شخص عزيز علي فهو جرحني كمان فهالجرح دفنته طبعا

3.اسوأ خبر سمعته

لما فقدت بنت خالتي بموت غامض كان خبر سيء وبنفس الوقت كان صدمه لالي وللكل

س4.هل لديكي ثقة بنفسك؟

شي اكيد ولو ما عندي ثقه بنفسي كان ما وصلت للي انا وصلته هلا والحمد لله كله بفضل رضى الوالده ومساعدتها طبعا كمان بالاضافه لثقتي بنفسي
والحمد لله عمري ما حطيت شي براسي وما عملته او ما حصلت عليه

س5. عندما تكتبين رد على موضوع معين هل تحس بأنك اعطيته حقه ام مجرد مجاملة للصاحب الموضوع؟؟

انا الحلو في وقلته لما انسالت مين مينا قلت ما بعرف اجامل حد واعور اعور بعينك ومش كل موضوع بقراه برد عليه الا الموضوع يلي بشدني وبعجبني مع تقديري لكل الاعضاء طبعا انا كلهم بحبهم وبحب اقرا مواضيعهم والرد اغلب الاحيان بكون حسب الموضوع

س6. هل انتي مهتمة بمنتدى الشلة او فقط مجرد تسلية؟

هههههههه يا عصفور هلا لو الواحد بده يتسلى بتسلى بمنتدى ما هو في مليون طريقه للواحد يتسلى فيها وطبعا لا انا ما بتسلى انا بجد مهتمه بهالمنتدى الحلو وبجد بحس اني بعرف كل الاعضاء من 100 سنه كمان ولا زعلك وقلتلك لما بغيب عنه بجد بفقده ولو انه تسليه لما بغيب عنه بتسلى بشي تاني وما برجعله لانه ازا ضليت تلعب او تتسلى بنفس اللعبه راح تزهق منها وتكبها او تشيلها في الخزانه وانا ما عملت هيك بمنتدانا الحبيب وبكفي مديره قمر

س7 .من هو من بين الاعضاء بالمنتدى

عضو توقيعه جميل

والله ما في حد محدد كلهم تقريبا توقيعاتهم حلوه

عضو نشيط جدا
رنوش واميره الاحزان ودريمر كان سايكوس الله يسهل عله وعصفور النار

عضو مفقود
سايكوس

عضو واثق من نفسه

يعني كان في سايكوس كمان بحس دريمر ولارا ردودها طبيعيه عصفور النار ورنوش هدول يلي بحسهم ما بتصنعوا بجد ابدا بالمنتدى

عضو مثقف
مش عارفه يعني ممكن اقول عن واحد مثقف ويطلع بالاخر كل مواضيعه منقوله متل لارا ههه

عضو يخافين منه

لا ما بخاف من ولا عضو ليش هو احنا بمدينة اشباح وبعدين المؤمن ما بخاف الا من ربه

العضو الافضل

كل الاعضاء مناح بس دايما اميره الاحزان بتكون السباقه على الردود ومهتمه كتير بالمنتدى

العضو الاسوا
كان سليم وطردته الله يسهل عليه


س8. ما هي أجمل مرحلة في حياتك ؟

اجمل مرحله كانت الاعدادي

س9. هل باعتقادك ان منتدى الشلة منتدى لا يوجد به اخطاء؟اذا كان به اخطاء ما هي بوجهة نظرك؟

يعني الكمال لله ما في شي بهالدنيا ما فيو اخطاء والاخطاء الحمد لله تصلحت منها شتم الاعضاء بعضهم وسب الاهالي وهاي محدا برضاها ولا باي ديانه ولا باي شريعه كمان الاهل يلي ربوا وتعبوا ينسبوا بالاخر

س10. ما هو أكثر شيء يثير ضيقك؟

اكتر شي لما ازعل الوالده مني بتضايق وبرجع بسرعه براضيها

س11.كلمة اخيرة توجهينها لاعضاء المنتدى؟

اول شي بدي اشكرك الك عصفور عالحوار الروعه هاي ويمكن كنت صريحه زياده عن اللزوم بس بتمنى من الكل يرد بصراحه ومن غير تمثيل يعني وبطلب من هالاعضاء الحلوين يساهموا في تطوير هالمنتدى اكتر عشان يصير من اوائل المنتدى
مشكور يا عصفور
في نهايه البرنامج بطلب اغنيه ست الحناين يا حنان انت
هههههههه

هههه
مشكورة يا مينا على ردودك الصريحة جدا.وبالفعل كان حوار جميل جدا وبتمنى اني ما اكون ازعجتك يا رب وان شاء الله بتتوفقي في حيا تك ومش بس تاخدي الماجستير ان شاء الله الدكتوراة يا رب.ونشوفك شخص عظيم بيخدم بلده.

والله ها ي مينا لو حطيتها بالهولولولو لتخربها مش تعمرها بعدين هاي هبله لو دورت عليها هلا لتلائيها دايره بالشوارع وبتئطع بشعرها بعدين يختي انتي بدك تضلك ئاعده لامك روحي تجوزي خليها تخلص منك الله يعينها على هللزئه والله يا مينا لتاكلي ئتله انا مش مثقفه اعلنت عليكي الحرب وبعدين ليش يختي من وين بتجيبي انتي مواضيعك؟؟؟

هههههه والله يا لارا مواضيعي بتكون من عدة اماكن واحيانا من تجارب وصح انا بدور بالشوارع بس وراكي عشان المك واروحك عالبيت بعدين يختي انا مضربه عن الزواج لاشعار اخر رفعت الجلسه ومشكور كتير يا عصفور النار عالدعوه الحلوه وان شاء الله بنكون لخدمة البلد وخدمة اولاد بلادنا كمان ولا ما كان فيها ازعاج كان حوار كتير حلو وانبسطت فيه ويا ريت تكون بس اجوبتي اعجبتكم

ماشي يا ام لسان طويل انا اكبر منك احترميني شوي بلاش الم المنتدى عليكي واشمت اعدائك فيكي هههههههههههههههه ههههههههههههههههه شو يا دريمر احضرنا

اول شي بشكر كتيرررررر عصفور نار على هذا الحوااار الصحفي بجننن روعة وانا بجاوب بكل صراحة

س 1منذ متى وانت عضوة في منتدى الشلة وكيف اصبحتي عضوة في المنتدى؟
انا عضوة بالمنتدى من يوم السبت ماي 17, 2008 واصبحت عضوة بالمنتدى عن طريق شخص عزيز على قلبي اميرة الاحزان ودريمررررر

س2 هل النيك نيم اللي انتي اخترتي يعبر حقيقة عنك او مجرد اسم؟
اها اكيد النيك نيم الي اخترتو بعبر عني بالحقيقة امورة يعني انو بعبر عن حالي امورة ودلوعة مرحة ونغنوشة هادول الصفات الي جمعتهم في كلمة امورة القدس
س3 من هي امورة القدس وما هو هدفها بالحياة؟
انا بنت عادية بسيطة مش متكبرررررررررر عندي كلشي الو وقتو وقت الجد جد وقت المرح مرح بحب اضحك وابكي صريحة كتير ما بحب اجامل حدا ولا حدا يجاملني لانو المجاملة صفة مش حلوة حساسة كتير يعني بزعل بسرعة حتى لو من اشي بسيطة يعني اوعكم حدا يزعلني هههههههههه حساسة لدرجة من اشي صغير بزعل وعصبية كتير يعني وقت ما اعصب ما بعرف حدا قدمي

هدفي بالحياة بان اصبح دكتورة لو مش دكتورة اشي بخص الطب اي شي بس يكون بالطب هذا حلمي من انا وصغيرررة بس ما بعرف اذا راح يتحقق ولا لا لانو مش كل هدف او اشي بدك اياه ممكن نصيررررررر

س4 ماهي رسالتك في هذه الحياة ولمن توجهها ؟
رسالتي بان نصبح يد واحد لتحرير كل الاطفال العالم المقهورة الى كل من له قلب رحيم

س5 من هو الشخص الذي تحتاجيه دائما الى جانبك؟
خالتي كتير بحبها وبحتاجه دايما الى جانبي لانو كتير بحبهااااااااااااا بتمنالها التوفيق من كل قلبي وتعيش سعيدة وفي كمان شخص كتير بحبوووووووو ما بدي يروح من ابدااااااا يعني هذا الشخص بحتاجو كمان

س6 ما هي اعظم صفة في الدنيا وهل هي موجودة فيكي؟
الصدق والامانة اها موجودين في

س7 وما هي اسوا صفة في الدنيا وهل هي موجودة فيكي؟
الكذب والخيانة لا مش موجودين في


س8 ما هي الوظيفة التي تتمنيها لنفسك؟
دكتورة هاي الوظيفة الي بتمنهاااااا

س9 حددي اسم اليوم اللي بتحبيه وليش واليوم اللي بتكرهيه وليش؟
بحب يوم الاحد لانو بشوف كل الناس الي بحبهم يعني يوم مميز بكون واكتر يوم بكرهووو السبت لانو ابوي بكون بالبيت طول النهار ههههههههه

س10 ماهو ابرز عقاب مر عليك طوال فترة الدراسة وباي سنه؟
ابرز عقاب بهدلة من المديرر لانو غبت من دون سبب وكان يوم مهم يعني لازم اجي على المدرسة بصف 11 قبل سنة يعني

س11 من هو
عضو تعلمتي منه الكثير ؟
اميرة الاحززززززان

عضو تتمني ان تراه شخصيا؟
مستر سكرر
عضو لا تتمني ان يغيب ابدا ؟
عاشق العذاب

- عضو مشاغب ؟
اسير الانتقام
- عضو يعتبر الاميز في نفسك ؟
عصفور نار
- عضو يثير اهتمامك ؟
عاشق العذاب
- عضو تعرفيه خارج المنتدى ؟
اميرة الاحزان
عضو تكونت لديك علاقة معه عن طريق المنتدى ؟
الكل اصدقائي يعني ما في حدا معين

عضو اكتشفت مؤخرا انكي لم تعامليه باهتمام ؟
القلب المجروح

س12 هل تشعر باتجاهك وتفاعلك في منتدى محدد ؟؟
ام تتعامل مع كل اقسام المنتدى بنفس درجة التفاعل؟؟
انا كتير بحب المنتدى العااام منتدى واحة الشعر والخواطر وعادي يعني بدخل كل الاقسام بس اكترر شي هادول

س13 كلمة اخيرة توجهينها لاعضاء المنتدى؟
بدي اشكررررررررررك يا عصفور نار على هذا الحوار صحفي روعة بجنن كتير حلووووووووووووو كلمة اخيررررة للاعضاء بانو نضل اصحاب ونعمل علة تطوير المنتدى مشكور كتير يا عصفور ناررر بجد حوار صحفي روعة

شكرا الك كتير يا امورة على اجاباتك الصريحة وبتمنى انه نشوفك دكتورة كبيرة في البلد ان شاء الله .وبتمنالك حياة سعيدة جدا يا احلى امورة بالمنتدى.